យុទ្ធសាស្រ្តទីផ្សាររបស់ម៉ាកលំដាប់ពិភពលោក

យុទ្ធសាស្ត្រទីផ្សាររបស់ម៉ាកលំដាប់ពិភពលោក 
នៅពេលអ្នកដឹងពីសាវតារ ពាក្យស្លោក និងយុទ្ធនាការទីផ្សារដែលបង្កើតឡើង ដោយម៉ាកលំដាប់ពិភពលោកទាំងនេះ អ្នកអាចនឹងក្លាយជាអ្នកគាំទ្រ ឬអតិថិជន ម្នាក់របស់ពួកគេដោយមិនដឹងខ្លួន។ អ្នកនឹងចងចាំរឿងរ៉ាវរបស់ពួកគេ ហើយមាន អារម្មណ៍ស្និទ្ធស្នាលជាមួយផលិតផលទាំងនោះ មុននឹងបានប្រើប្រាស់ទៅទៀត។ ពួកគេពូកែបង្កើតរូបារម្មណ៍ ភាពទាក់ទាញ ចិត្តសាស្ត្រ និងផ្សារភ្ជាប់មនុស្សជាមួយ ផលិតផលរបស់ពួកគេ។ នេះហើយហៅថាយុទ្ធសាស្រ្តទីផ្សារ។ ក្រៅពីសមត្ថភាព ក្នុងការបង្កើតផលិតផលដែលមានគុណភាព អ្វីដែលសហគ្រិនត្រូវចេះច្បាស់នោះ គឺវិធីលក់ផលិតផលរបស់ខ្លួនក្នុងបរិមាណសមរម្យ តម្លៃល្អ និងរូបភាពថ្លៃថ្នូរ។ ផលិតផលខ្លះ អាចលក់បានក្នុងចំនួនដ៏ច្រើន។ ផលិតផលខ្លះអាចលក់បានក្នុង ចំនួនកំណត់ ប៉ុន្តែមានថ្លៃខ្ពស់មិនគួរឲ្យជឿ។ ហើយផលិតផលខ្លះទៀតលក់បាន ទាំងចំនួនច្រើន តម្លៃខ្ពស់ និងក្នុងរយៈពេលច្រើនជំនាន់នៃជីវិតមនុស្ស។ អ្នកអាច កត់សម្គាល់ឃើញថា របស់ខ្លះបានរស់ដល់ទៅរាប់រយឆ្នាំមកហើយនៅលើទីផ្សារ ហើយរូបភាព និងយីហោរបស់វានៅតែរឹងមាំ និងឈានមុខ។ 
តោះ! សាកល្បងស្វែងយល់ពីយុទ្ធសាស្រ្តទីផ្សារដ៏មានប្រសិទ្ធភាព និងគួរឲ្យចាប់ អារម្មណ៍បំផុតដែលម៉ាកឈានមុខនៅក្នុងពិភពលោកបានប្រើប្រាស់។ សៀវភៅ នេះក៏នឹងពិនិត្យមើលមូលដ្ឋានសំខាន់ៗ ជុំវិញយុទ្ធសាស្រ្តទីផ្សារ ដែលមានដូចជា ការបែងចែកចំណែកទីផ្សារ យុទ្ធនាការទីផ្សារ ការកំណត់តម្លៃ ការផ្សព្វផ្សាយ ពាណិជ្ជកម្ម និងរឿងរ៉ាវដែលជាអត្តសញ្ញាណរបស់ម៉ាកល្បីៗនៅលើពិភពលោក ពីវិស័យធុរកិច្ចផ្សេងៗគ្នា។ 
ស្វែងយល់ពីយុទ្ធសាស្ត្រទាំងនេះ សហគ្រិននឹងទទួលបានការយល់ដឹងបន្ថែម និង គំនិតថ្មីៗក្នុងការច្នៃប្រឌិតវិធីសាស្ត្រដើម្បីជំរុញការលក់ និងពង្រឹងម៉ាកផលិតផល របស់ពួកគេ។